საქართველოს სახელმწიფო საზღვრის დაცვის სახელმწიფო დეპარტამენტის სასაზღვრო ავიაციის განვითარების ზოგიერთ დროებით ღონისძიებათა შესახებ

საქართველოს პრეზიდენტის

ბრძანებულება №321

2001 წლის 5 ივლისი

ქ. თბილისი

საქართველოს სახელმწიფო საზღვრის დაცვის სახელმწიფო დეპარტამენტის სასაზღვრო ავიაციის განვითარების ზოგიერთ დროებით ღონისძიებათა შესახებ

საქართველოს სასაზღვრო ავიაციისათვის დაკისრებული ფუნქციებისა და მოვალეობების ეფექტიანად შესრულებისა და ამ დარგში დაკვეთების მომსახურების რეგულირების მიზნით საქართველოს საჰაერო კოდექსის 72-ე მუხლის მეხუთე და მეშვიდე ნაწილების შესაბამისად, საქართველოს სახელმწიფო საზღვრის დაცვის სახელმწიფო დეპარტამენტს ნება დაერთოს:

1. შეასრულოს საავიაციო სამუშაოები შიდასაუწყებო წესებისა და ფრენის უსაფრთხოების უზრუნველყოფის სანორმატივო მოთხოვნათა დაცვით დაკვეთის შემთხვევაში ტრანსპორტისა და კომუნიკაციების სამინისტროს ნებართვით, ხოლო საკუთარი საჭიროებისათვის – ნებართვის გარეშე.

2. საავიაციო სამუშაოთა დაკვეთების შესრულების ღირებულება განისაზღვროს ხელშეკრულების საფუძველზე, ხოლო საქართველოს სახელმწიფო დაცვის სპეციალური სამსახურის დაკვეთის შესრულებისას  –  თვითღირებულების ფარგლებში.

3. საფრენ საავიაციო საშუალებებს მომსახურება გაუწიოს სადგომებით და შეასრულოს მათი ავიატექნიკური მომსახურება ხელშეკრულების საფუძველზე, ხოლო საქართველოს სახელმწიფო დაცვის სპეციალური სამსახურის საფრენ საავიაციო საშუალებებს – თვითღირებულების ფარგლებში.

4. მიღებული შემოსავლების 20 პროცენტი ჩარიცხოს სახელმწიფო ბიუჯეტში, ხოლო 80 პროცენტი – საქართველოს სახელმწიფო საზღვრის დაცვის სახელმწიფო დეპარტამენტის სპეციალურ ანგარიშზე.

5. აღნიშნული გზით მიღებული თანხა გამოიყენოს სასაზღვრო ძალების თანამშრომელთა მატერიალური სტიმულირებისა და სასაზღვრო ავიაციის ტექნიკური ბაზის გაუმჯობესებისათვის.

6. მიღებული თანხის ხარჯვა განახორციელოს კანონმდებლობით დადგენილი  წესით.

ე. შევარდნაძე