საქართველოს იუსტიციის სამინისტროს მინისტრის აპარატის დებულების დამტკიცების შესახებ

სახელმწიფო სარეგისტრაციო კოდი 010.240.030.11.106.005.195

საქართველოს იუსტიციის მინისტრის

ბრძანება №158

2002 წლის 18 მარტი

ქ. თბილისი

საქართველოს იუსტიციის სამინისტროს მინისტრის აპარატის დებულების დამტკიცების შესახებ

„აღმასრულებელი ხელისუფლების სტრუქტურისა და საქმიანობის წესის შესახებ” საქართველოს 1997 წლის 15 აპრილის კანონისა და საქართველოს პრეზიდენტის 2001 წლის 31 დეკემბრის №544 ბრძანებულებით დამტკიცებული საქართველოს იუსტიციის სამინისტროს დებულების შესაბამისად, ვბრძანებ:

1. დამტკიცდეს საქართველოს იუსტიციის სამინისტროს მინისტრის აპარატის თანდართული დებულება (დანართი №1).

2. ეს ბრძანება ძალაშია გამოქვეყნებისთანავე.

რ. გილიგაშვილი

დანართი №1

საქართველოს იუსტიციის სამინისტროს მინისტრის აპარატის

დებულება

თავი I

ზოგადი დებულებანი

    მუხლი 1

საქართველოს იუსტიციის სამინისტროს მინისტრის აპარატი (შემდგომში – მინისტრის აპარატი) არის საქართველოს იუსტიციის სამინისტროს სტრუქტურული ქვედანაყოფი.

    მუხლი 2

მინისტრის აპარატი თავის საქმიანობაში ხელმძღვანელობს საქართველოს კონსტიტუციით და სხვა საკანონმდებლო აქტებით. საქართველოს პრეზიდენტისა და საქართველოს იუსტიციის მინისტრის სამართლებრივი აქტებით, მინისტრის ცალკეული დავალებებით.

    მუხლი 3

მინისტრის აპარატი თავისი ამოცანებისა და ფუნქციების განხორციელებისას წარმოადგენს საქართველოს იუსტიციის სამინისტროს.

    მუხლი 4

მინისტრის აპარატი ანგარიშვალდებულია იუსტიციის მინისტრის წინაშე, რომელიც წარმართავს აპარატის საქმიანობას და ახორციელებს მასზე სამსახურებრივ ზედამხედველობას კანონმდებლობით დადგენილი წესით.

თავი II

მინისტრის აპარატის ამოცანები და ფუნქციები

    მუხლი 5

1. მინისტრის აპარატის ძირითადი ამოცანაა საკუთარი კომპეტენციის ფარგლებში მინისტრისათვის ორგანიზაციულ-ტექნიკური, საინფორმაციო და სამართლებრივი მომსახურების გაწევა.

2. თავისი ამოცანების და ფუნქციების განსახორციელებლად მინისტრის აპარატი უფლებამოსილია გამოითხოვოს და მიიღოს სათანადო ინფორმაცია და მასალები სამინისტროს სტრუქტურული ქვედანაყოფებისა და მის სისტემასა და მმართველობის სფეროში შემავალი სამსახურებისაგან.

    მუხლი 6

მინისტრის აპარატი ახორციელებს შემდეგ ფუნქციებს:

მინისტრის ბრძანებების შესრულებაზე კონტროლს;

ა) სამინისტროს ცალკეული სტრუქტურული ქვედანაყოფებისა და თანამდებობების პირებისადმი მინისტრის დავალებების, მითითების და განკარგულებების შესრულებაზე კონტროლს;

ბ) სამინისტროს სტრუქტურულ ქვედანაყოფებში დაკისრებული ფუნქციების, ან ცალკეულ დავალებათა შესრულების მდგომარეობის შესწავლასა და შედეგების მინისტრისათვის მოხსენებას;

გ) ოპერატიული თათბირების ორგანიზებას, თათბირის ოქმის შედგენას;

დ) მინისტრის შეხვედრების განრიგის დაგეგმვასა და მომზადებას;

ე) მინისტრის სტუმრების მიღების უზრუნველყოფას;

ვ) მინისტრის მივლინებების ორგანიზებას;

ზ) მინისტრის მიერ მოქალაქეთა მიღების საკითხების რეგულირებას;

თ) მინისტრის სახელზე შემოსული განსაკუთრებით მნიშვნელოვანი მასალებისა და ინფორმაციის მინისტრისათვის ოპერატიულად მოხსენებას;

ი) მინისტრის მოხსენებების, გამოსვლების, ანგარიშების მომზადებას;

კ) აწესრიგებს მინისტრის სათათბირო ორგანოების საქმიანობის ორგანიზაციულ საკითხებს, წინასწარ განიხილავს და მინისტრთან ათანხმებს მასზე გასატანი საკითხების განხილვის მიზანშეწონილობას;

ლ) ასრულებს სხვადასხვა საკითხებთან დაკავშირებით მინისტრის მიერ დაკისრებულ კონკრეტულ დავალებებს.

თავი III

მინისტრის აპარატის უფროსი

    მუხლი 7

1. მინისტრის აპარატს ხელმძღვანელობს აპარატის უფროსი.

2. მინისტრის აპარატის უფროსს კანონმდებლობით დადგენილი წესით თანამდებობაზე ნიშნავს და თანამდებობიდან ათავისუფლებს მინისტრი.

3. მინისტრის აპარატის უფროსი უშუალოდ ექვემდებარება მინისტრს.

    მუხლი 8

მინისტრის აპარატის უფროსი:

ა) ხელმძღვანელობს და წარმართავს აპარატის საქმიანობას;

ბ) ანაწილებს მოვალეობებს მისდამი დაქვემდებარებულ სახელმწიფო მოხელეებს შორის და აძლევს მათ მითითებებს და განკარგულებებს;

გ) წარუდგენს მინისტრს აპარატის მოხელეების კანდიდატურებს;

დ) აკონტროლებს აპარატის მოხელეების მიერ თავიანთი სამსახურებრივი მოვალეობების შესრულებას;

ე) ხელს აწერს ან ვიზირებას უკეთებს აპარატში მომზადებულ დოკუმენტებს;

ვ) ანგარიშს აბარებს მინისტრს აპარატის მუშაობის შესახებ;

ზ) წარუდგენს მინისტრს წინადადებებს აპარატის სტრუქტურის, შტატების, მუშაობის ორგანიზაციის, აპარატის მოხელეების მატერიალური სტიმულირების დანიშვნის, მათი წახალისების ან მათთვის დისციპლინური პასუხისმგებლობის დაკისრების შესახებ;

თ) შუამდგომლობს იმ სახსრების გამოყოფის თაობაზე, რომლებიც საჭიროა აპარატის ამოცანების შესასრულებლად;

ი) შუამდგომლობს აპარატის მოხელეთა კვალიფიკაციის ამაღლების შესახებ;

კ) ასრულებს მინისტრის მიერ განსაზღვრულ კონკრეტულ დავალებებს;

ლ) პასუხისმგებელია აპარატის დაკისრებული ამოცანებისა და ფუნქციების შესრულებაზე.

    მუხლი 9

მინისტრის აპარატის უფროსის მიერ თავისი სამსახურებრივი უფლებამოსილების შესრულების შეუძლებლობის შემთხვევაში მის მოვალეობებს ასრულებს ერთ-ერთი მრჩეველი აპარატის უფროსის დავალებით მინისტრთან შეთანხმებით.

თავი IV

მინისტრის აპარატის პერსონალი

    მუხლი 10

1. მინისტრის აპარატის პერსონალი შედგება მოხელეებისა და დამხმარე მოსამსახურეებისაგან, რომელთა რაოდენობა განისაზღვრება სამინისტროს საშტატო განრიგით.

2. აპარატის თანამშრომლები ასრულებენ მინისტრისა და უფროსის მიერ დაკისრებულ მოვალეობებს და ცალკეულ დავალებებს.

3. აპარატის საჯარო მოსამსახურეებს კანონმდებლობით დადგენილი წესით თანამდებობაზე ნიშნავს და თანამდებობიდან ათავისუფლებს მინისტრი.

თავი V

დასკვნითი დებულება

    მუხლი 11

მინისტრის აპარატის დებულების გაუქმება, მასში ცვლილებებისა და დამატებების შეტანა ხდება მინისტრის ბრძანებით.