„საქართველოს შინაგან საქმეთა სამინისტროს საპატრულო პოლიციის დეპარტამენტის დებულების დამტკიცების შესახებ“ საქართველოს შინაგან საქმეთა მინისტრის 2013 წლის 31 დეკემბრის N993 ბრძანებით დამტკიცებულ დებულებაში ცვლილების შეტანის თაობაზე

1. მე-9 მუხლის პირველი პუნქტის „პ“ ქვეპუნქტის  შემდეგ დაემატოს შემდეგი შინაარსის „ჟ“ ქვეპუნქტი:

 „ჟ) მიგრაციის მთავარი სამმართველო.“.

 2. დაემატოს შემდეგი შინაარსის  VII თავი:

„VII თავი 

დეპარტამენტის მიგრაციის მთავარი სამმართველოს სტრუქტურა და კომპეტენცია

მუხლი 17. მიგრაციის მთავარი სამმართველო

1.  მიგრაციის მთავარი სამმართველო:

ა) უზრუნველყოფს სასაზღვრო გამტარ პუნქტებში სასაზღვრო რეჟიმის დაცვის ღონისძიებათა შემუშავებასა და მათი რეალიზაციის კონტროლს;

ბ) ახორციელებს საქართველოს კანონმდებლობით გათვალისწინებულ სხვა უფლებამოსილებებს.

2.  მიგრაციის მთავარი სამმართველოს სტრუქტურული დანაყოფებია:

ა) უკანონო მიგრაციის წინააღმდეგ ბრძოლის სამმართველო;

ბ) სამართლებრივი უზრუნველყოფისა და ანალიტიკური სამმართველო;

გ) დროებითი განთავსების ცენტრი (სამმართველო).

მუხლი 18. მიგრაციის მთავარი სამმართველოს სტრუქტურული დანაყოფების კომპეტენცია

1. უკანონო მიგრაციის წინააღმდეგ ბრძოლის სამმართველო:

ა) საქართველოს საზღვრის სამართლებრივი რეჟიმის დაცვისა და სამიგრაციო კონტროლის განხორციელების მიზნით, მოქმედი კანონმდებლობის თანახმად, ვიზის სახელმწიფო საზღვარზე გაცემის შემთხვევაში, უზრუნველყოფს უცხო ქვეყნის მოქალაქეთა საქართველოში მოწვევის საკითხების განხილვას;

ბ)   მართავს არალეგალ მიგრანტთა აღმოჩენის სისტემას;

გ) გადასცემს ინფორმაციას საპატრულო პოლიციის ან/და ტერიტორიული ორგანოს უფლებამოსილ პირს კანონმდებლობით გათვალისწინებული პროცედურების/ღონისძიებების განხორციელების მიზნით;

დ)  ახორციელებს დაკავებული პირის იდენტიფიცირებას;

ე) ინფორმაციის გაცვლის მიზნით თანამშრომლობს დიპლომატიურ წარმომადგენლობებსა და საკონსულო დაწესებულებებთან, აგრეთვე სხვა სახელმწიფო, არასამთავრობო ან/და საერთაშორისო ორგანიზაციებთან.

 2.  სამართლებრივი უზრუნველყოფისა და ანალიტიკური სამმართველო:

ა) უზრუნველყოფს მიგრაციის მთავარი სამმართველოს სამართლებრივი ბაზის მომზადებასა და შემდგომ განვითარებას;

ბ) საჭიროების შემთხვევაში უწევს სამართლებრივ კონსულტაციას საქართველოს ტერიტორიაზე კანონიერი საფუძვლის გარეშე მყოფ  უცხოელებს;

გ)  კომპეტენციის ფარგლებში შეიმუშავებს წინადადებებსა და პროექტებს ნორმატიულ აქტებში ცვლილებებისა და დამატებების შეტანის მიზნით;

დ) აკეთებს უკანონო მიგრაციის შესახებ სტატისტიკური მონაცემების ანალიზს;

ე) უზრუნველყოფს უცხო ქვეყნის მოქალაქეთა ინფორმირებას ქვეყანაში სამიგრაციო წესების შესახებ.

3.  დროებითი განთავსების ცენტრი (სამმართველო):   

ა) ახორციელებს დროებითი განთავსების ცენტრში შემოსულ უცხოელთა რეგისტრაციას, მათი პირადი ნივთების  აღრიცხვასა და შენახვას;

ბ) უზრუნველყოფს დროებითი განთავსების ცენტრის ტერიტორიაზე უსაფრთხოების ღონისძიებების გატარებას;  

გ) უზრუნველყოფს დროებითი განთავსების ცენტრში მოქმედი რეჟიმის დაცვას, მასში განთავსებულ უცხოელებზე მეთვალყურეობას და უცხოელის მიერ წესრიგის დარღვევის შემთხვევაში ახორციელებს შესაბამის რეაგირებას;

დ) აღრიცხავს დროებითი განთავსების ცენტრის ვიზიტორებს და უზრუნველყოფს მათ უსაფრთხოებას;

ე) ზედამხედველობს ცენტრის ტერიტორიაზე არსებულ ინვენტარსა და ტექნიკურ საშუალებებს;

ვ) უზრუნველყოფს სანიტარული ნორმების დაცვას;

ზ) იღებს განთავსების ცენტრში განთავსებულ უცხოელთა საჩივრებს, თხოვნებსა და განცხადებებს და კომპეტენციის ფარგლებში ახორციელებს სათანადო რეაგირებას;

თ) აუცილებლობის შემთხვევაში უწევს გადაუდებელ დახმარებას ცენტრში განთავსებულ უცხოელებს;

ი) საჭიროების შემთხვევაში ახორციელებს საქართველოს ტერიტორიაზე უცხოელის ტრანსპორტირებას/გადაყვანას;

კ) საქართველოს განათლებისა და მეცნიერების სამინისტროს შესაბამის სამსახურებთან ერთად შეიმუშავებს საგანმანათლებლო-საინტეგრაციო პროგრამებს უცხოელთათვის;

ლ) ახორციელებს ტრენინგების ორგანიზებას განთავსების ცენტრის მოსამსახურეთათვის.“.