„ვეტერინარული საქმიანობის განმახორციელებელი ბიზნესოპერატორებისა და აგრარული ბაზრების/ბაზრობების, სადაც ხორციელდება ცოცხალი ცხოველის რეალიზაცია, ვეტერინარული სახელმწიფო კონტროლის განხორციელების წესის დამტკიცების თაობაზე“ საქართველოს მთავრობის 2018 წლის 26 ივნისის №338 დადგენილებაში ცვლილების შეტანის შესახებ

1.  მე-3 მუხლის:

ა) პირველი პუნქტის:

ა.ა) „ა“ ქვეპუნქტი ჩამოყალიბდეს შემდეგი რედაქციით:

„ა) ვეტერინარული საქმიანობის განმახორციელებელი ბიზნესოპერატორი − ვეტერინარული დაწესებულება, ვეტერინარული პრეპარატების საწარმო, ვეტერინარული აფთიაქი, ვეტერინარული პრეპარატების საბითუმო ვაჭრობის ობიექტი, ცხოველების თავშესაფარი, ცხოველების დროებითი მოთავსების ობიექტი (სასტუმრო), საშენი, კინოლოგიური/ფელინოლოგიური დაწესებულება, შინაური ბინადარი ცხოველების რეალიზატორი, ცხოველების მოვლისა და ჰიგიენური მომსახურების (გრუმინგი) ობიექტი, ზოომაღაზია;“;

ა.ბ) „დ“ და „ე“ ქვეპუნქტები ჩამოყალიბდეს შემდეგი რედაქციით:

„დ) იმუნოლოგიური პრეპარატი – ვეტერინარული პრეპარატი, რომელიც გამოიყენება ცხოველებში აქტიური ან პასიური იმუნიტეტის გამომუშავებისათვის ან იმუნური მდგომარეობის განსაზღვრისთვის;

ე) ეტიკეტი − ინფორმაცია, რომელიც განთავსებულია ვეტერინარული  პრეპარატის პირველად ან/და მეორეულ შეფუთვაზე;“;

ბ)  მე-2 პუნქტი ჩამოყალიბდეს შემდეგი რედაქციით:

„2.  ამ წესის მიზნებისათვის გამოიყენება ასევე სურსათის/ცხოველის საკვების უვნებლობის, ვეტერინარიისა და მცენარეთა დაცვის კოდექსითა  და „შინაურ ბინადარ ცხოველთა შესახებ“ საქართველოს კანონით განსაზღვრული ტერმინები.“.

2.  მე-4 მუხლის:

ა)  პირველი პუნქტი ჩამოყალიბდეს შემდეგი რედაქციით:

„1. ინსპექტირება არის სახელმწიფო კონტროლის მექანიზმი, რომლის დროსაც ხორციელდება:

ა) ვეტერინარული საქმიანობის განმახორციელებელი ბიზნესოპერატორის საქმიანობის შემოწმება მისი საქართველოს კანონმდებლობით განსაზღვრულ მოთხოვნებსა და წესებთან შესაბამისობის დასადგენად, რომელიც მოიცავს:

ა.ა) ვეტერინარული საქმიანობის განმახორციელებელი ბიზნესოპერატორების საქმიანობის შემოწმებას, რომელიც ხორციელდება ვეტერინარული პრეპარატების წარმოებისა და დისტრიბუციის, მათ შორის, რეალიზაციის, აგრეთვე ცხოველების მოვლა-შენახვისა და მკურნალობის ეტაპზე. ასევე ცხოველის ჯანმრთელობისა და კეთილდღეობის მდგომარეობის შესაფასებლად;

ა.ბ) დოკუმენტურ შემოწმებას;

ა.გ) საჭიროების შემთხვევაში, სინჯის, ნიმუშის, პათოლოგიური მასალის აღებასა და ლაბორატორიულ გამოკვლევას;

ბ) საქართველოში სპეციალური კონტროლისადმი დაქვემდებარებული ნივთიერების გამოყენებასთან დაკავშირებული მოთხოვნებისა და წესების დაცვის შემოწმება;

გ) ცხოველის იდენტიფიკაცია-რეგისტრაციის შემოწმება.“;

ბ) მე-4 პუნქტის „ა“ ქვეპუნქტი ჩამოყალიბდეს შემდეგი რედაქციით:

„ა) სახელმწიფო კონტროლის შედეგების საფუძველზე, მათ შორის, სააგენტოს მიერ აღებული სინჯის, ნიმუშის ან პათოლოგიური მასალის ლაბორატორიული გამოკვლევის შედეგების საფუძველზე;“.

3.  მე-10 მუხლის:

ა) პირველი პუნქტი ჩამოყალიბდეს შემდეგი რედაქციით:

„1. ვეტერინარული პრეპარატის ნიმუშის აღება არის სახელმწიფო კონტროლის მექანიზმი, რომელიც ხორციელდება ორგანოლეპტიკური, მიკრობიოლოგიური, ტოქსიკოლოგიური, ფიზიკურ-ქიმიური, რადიოლოგიური ან/და სხვა მაჩვენებლების გამოსაკვლევად, რათა განისაზღვროს ცხოველის ჯანმრთელობისა და კეთილდღეობისთვის მოსალოდნელი რისკი.“;

ბ) მე-4 პუნქტი ჩამოყალიბდეს შემდეგი რედაქციით:

„4. ვეტერინარული პრეპარატის ნიმუშის აღება შესაძლებელია განხორციელდეს ვეტერინარული პრეპარატების საწარმოში, ვეტერინარულ დაწესებულებაში, საშენში, ცხოველების მოვლისა და ჰიგიენური მომსახურების (გრუმინგი) ობიექტში, თავშესაფარსა და ზოომაღაზიაში, მისი შესყიდვის გარეშე.“;

გ) მე-5 პუნქტის „ა“ და „ბ“ ქვეპუნქტები ჩამოყალიბდეს შემდეგი რედაქციით:

„ა) თუ ორგანოლეპტიკური დათვალიერებით არსებობს ეჭვი, რომ ვეტერინარული პრეპარატი არის ფალსიფიცირებული, უვარგისი, ცხოველის ჯანმრთელობისა და კეთილდღეობისთვის სახიფათო ან/და არ არის დაცული ინსტრუქციით ან სხვა თანმხლები დოკუმენტაციით განსაზღვრული შენახვის პირობები;

 ბ) თუ არსებობს ინფორმაცია, რომ მწარმოებელ ქვეყანაში შესაბამისი ვეტერინარული პრეპარატი არის ფალსიფიცირებული, უვარგისი, ვადაგასული ან/და ცხოველის ჯანმრთელობისა და კეთილდღეობისთვის  სახიფათო;“.