„ქვეყანაში სიღატაკის დონის შემცირებისა და მოსახლეობის სოციალური დაცვის სრულყოფის ღონისძიებათა შესახებ“ საქართველოს მთავრობის 2010 წლის 24 აპრილის №126 დადგენილებაში ცვლილების შეტანის თაობაზე

1. დადგენილების პირველი მუხლის პრეამბულა ჩამოყალიბდეს შემდეგი რედაქციით:

„სოციალური დახმარების მიზანმიმართულებისა და ეფექტიანობის გაზრდის, თანამედროვე გამოცდილების დანერგვის მიზნით, „საქართველოს  მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის მე-5 მუხლის „ო“ ქვეპუნქტის საფუძველზე:“.

 2. დადგენილებით  დამტკიცებული „სოციალურად დაუცველი ოჯახების მონაცემთა ერთიანი ბაზის ფორმირების წესის“:

 ა) მე-8 მუხლის:

ა.ა) მე-5 პუნქტის შემდეგ დაემატოს შემდეგი შინაარსის 5¹ და 5² პუნქტები:

„5¹. ამ წესით განსაზღვრული პირობების შესაბამისად, მონაცემთა ბაზაში რეგისტრაცია შეუწყდება ოჯახის გარდაცვლილ წევრს, აგრეთვე ოჯახის იმ წევრს, რომელსაც მონაცემთა ბაზაში რეგისტრაციის შემდეგ დაუფიქსირდება ამ წესის მე-2 მუხლის პირველი პუნქტის „ბ.ა“ − „ბ.ზ“ ქვეპუნქტებით გათვალისწინებული ერთ-ერთი სტატუსი ან რომელიც ამავე წესის მე-4 მუხლის მე-2 პუნქტით განსაზღვრულ პირთა წრეს აღარ მიეკუთვნება.

5². ამ მუხლის 5¹ პუნქტის მოქმედება ვრცელდება იმ ოჯახზეც, რომელიც სარგებლობს „სოციალური დახმარების შესახებ“ საქართველოს მთავრობის 2006 წლის 28 ივლისის №145 დადგენილებით დამტკიცებული წესის 9​³ მუხლით ან „პილოტური პროგრამის − ერთად ოჯახების გაძლიერებისათვის დამტკიცების შესახებ“ საქართველოს მთავრობის 2023 წლის 22 მაისის №186 დადგენილებით განსაზღვრული საშეღავათო პირობებით.“;

ა.ბ) მე-7 პუნქტის „დ“ ქვეპუნქტი ამოღებულ იქნეს;

ა.გ) 7¹ პუნქტი ჩამოყალიბდეს შემდეგი რედაქციით:

„7^​1. ამ მუხლის მე-7 პუნქტის „ე“ და „ზ“ ქვეპუნქტებითა და 7² პუნქტით გათვალისწინებული რეგისტრაციის შეწყვეტის საფუძველი არ ვრცელდება იმ ოჯახზე, რომელიც სარგებლობს „სოციალური დახმარების შესახებ“ საქართველოს მთავრობის 2006 წლის 28 ივლისის №145 დადგენილებით დამტკიცებული წესის 9​³ მუხლით ან „პილოტური პროგრამის − ერთად ოჯახების გაძლიერებისათვის დამტკიცების შესახებ“ საქართველოს მთავრობის 2023 წლის 22 მაისის №186 დადგენილებით განსაზღვრული საშეღავათო პირობებით.“;

ა.დ) 7¹ პუნქტის შემდეგ დაემატოს შემდეგი შინაარსის 7² პუნქტი:

„7². თუ მონაცემთა ბაზაში რეგისტრირებული ოჯახის მიერ ხელფასის სახით მიღებული დასაბეგრი შემოსავალი საანგარიშო თვის წინა 3 თვის განმავლობაში, სსიპ − შემოსავლების სამსახურის მიერ მოწოდებული მონაცემების მიხედვით, ოჯახის ერთ წევრზე გაანგარიშებით, ყოველთვიურად ტოლია ან მეტია 1 250 ლარზე, ოჯახს შეუწყდება მონაცემთა ბაზაში რეგისტრაცია სოციალურ-ეკონომიკური მდგომარეობის შეფასების გარეშე.“;

ბ) 12¹ მუხლის:

ბ.ა) მე-3 პუნქტი ამოღებულ იქნეს;

ბ.ბ) მე-4 პუნქტი ჩამოყალიბდეს შემდეგი რედაქციით:

„4. 2026 წლის განმავლობაში სააგენტომ მონაცემთა ბაზაში რეგისტრირებული ოჯახების (მათ შორის, იმ ოჯახების, რომლებზეც გავრცელდა საქართველოს მთავრობის 2020 წლის 23 მაისის №322 დადგენილებით დამტკიცებული „იზოლაციისა და კარანტინის წესებით“ განსაზღვრული ადმინისტრირების ნორმები) სოციალურ-ეკონომიკური მდგომარეობის გადამოწმება უზრუნველყოს ამ წესის შესაბამისად, პრიორიტეტულად − საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის ინდივიდუალური ადმინისტრაციულ-სამართლებრივი აქტით დამტკიცებული საფუძვლებით.“;

ბ.გ) მე-5 პუნქტი ამოღებულ იქნეს.