ჩოხატაურის მუნიციპალიტეტის ტერიტორიაზე დასუფთავების მოსაკრებლის განაკვეთებისა და მისი გადახდის ინსტრუქციის დამტკიცების შესახებ

დოკუმენტის სტრუქტურა

განმარტებების დათვალიერება

დაკავშირებული დოკუმენტები

დოკუმენტის მონიშვნები

ჩოხატაურის მუნიციპალიტეტის ტერიტორიაზე დასუფთავების მოსაკრებლის განაკვეთებისა და მისი გადახდის ინსტრუქციის დამტკიცების შესახებ
დოკუმენტის ნომერი	8
დოკუმენტის მიმღები	ჩოხატაურის მუნიციპალიტეტი
მიღების თარიღი	16/07/2026
დოკუმენტის ტიპი	მუნიციპალიტეტის საკრებულოს დადგენილება
გამოქვეყნების წყარო, თარიღი	ვებგვერდი, 20/07/2026
ძალაში შესვლის თარიღი	01/09/2026
სარეგისტრაციო კოდი	210020010.35.114.016560

PDF გადმოწერა

ჩოხატაურის მუნიციპალიტეტის ტერიტორიაზე დასუფთავების მოსაკრებლის განაკვეთებისა და მისი გადახდის ინსტრუქციის დამტკიცების შესახებ

საქართველოს ორგანული კანონის ,,ადგილობრივი თვითმმართველობის კოდექსი“ 24-ე მუხლის პირველი პუნქტის „დ.ბ“ ქვეპუნქტის, 61-ე მუხლის მეორე პუნქტის, 93-ე მუხლის მე-2 პუნქტის, „ადგილობრივი მოსაკრებლების შესახებ“ საქართველოს კანონის მე-3 და მე-4 მუხლების, მე-5 მუხლის მე-3 პუნქტის, 12^I მუხლის, „ნორმატიული აქტების შესახებ“ საქართველოს ორგანული კანონის 23-ე მუხლის პირველი პუნქტისა და 25-ე მუხლის პირველი პუნქტის „ბ“ ქვეპუნქტის საფუძველზე, ჩოხატაურის მუნიციპალიტეტის საკრებულო ადგენს:

მუხლი 1

დამტკიცდეს ჩოხატაურის მუნიციპალიტეტის ტერიტორიაზე დასუფთავების მოსაკრებლის განაკვეთები და მისი გადახდის ინსტრუქცია დანართი 1-ის შესაბამისად.

მუხლი 2

დაწესებულებებისათვის, ორგანიზაციებისათვის, ინდივიდუალური მეწარმეებისა და იურიდიული პირებისათვის დაწესდეს დასახლებული ტერიტორიის დასუფთავების მოსაკრებელი და მისი ოდენობა განისაზღვროს დანართი 2-ის შესაბამისად.

მუხლი 3

ძალადაკარგულად გამოცხადდეს ,,ჩოხატაურის მუნიციპალიტეტის ტერიტორიაზე დასუფთავებისათვის მოსაკრებლის შემოღების, გადახდის ინსტრუქციისა და გადახდის ქვითრის ტიპური ფორმის დამტკიცების შესახებ“ - ჩოხატაურის მუნიციპალიტეტის საკრებულოს 2019 წლის 19 ივნისის №6 დადგენილება. (www.matsne.gov.ge; 21/06/2019, სარეგისტრაციო კოდი: 210020010.35.114.016422).

მუხლი 4

დადგენილება ამოქმედდეს 2026 წლის 1 სექტემბრიდან.

ჩოხატაურის მუნიციპალიტეტის საკრებულოს თავმჯდომარე ჯუმბერი ბერძენიშვილი

ჩოხატაურის მუნიციპალიტეტის ტერიტორიაზე დასუფთავების მოსაკრებლის განაკვეთები და მისი გადახდის ინსტრუქცია

მუხლი 1. ზოგადი ნაწილი

1. ჩოხატაურის მუნიციპალიტეტის ტერიტორიის დასუფთავების მოსაკრებლის გადახდის ინსტრუქცია (შემდეგში – ინსტრუქცია) აწესრიგებს ჩოხატაურის მუნიციპალიტეტის ტერიტორიაზე საყოფაცხოვრებო ნარჩენების წარმომქმნელთა მიერ დასახლებული ტერიტორიის დასუფთავების მოსაკრებლის გადახდასთან დაკავშირებულ ურთიერთობებს, განსაზღვრავს მოსაკრებლის განაკვეთს, გადახდის წესსა და მოსაკრებლის გადამხდელთა უფლება-მოვალეობებს.

2. ჩოხატაურის მუნიციპალიტეტის ტერიტორიის დასუფთავების მოსაკრებელი (შემდგომში – მოსაკრებელი) წარმოადგენს ჩოხატაურის მუნიციპალიტეტის ტერიტორიაზე ნარჩენების შეგროვების და გატანის სისტემის მქონე, დასახლებულ ტერიტორიაზე საყოფაცხოვრებო ნარჩენების წარმომქმნელთა მიერ, დასახლებული ტერიტორიის დასუფთავების მოსაკრებელს.

3. ნარჩენების წარმომქმნელი ვალდებულია მოსაკრებელი გადაიხადოს დადგენილ ვადებში.

4. ფიზიკურ და იურიდიულ პირებს, მოსაკრებლის ოდენობის განსაზღვრის მიზნით, ეგზავნება მოკლე ტექსტური შეტყობინება მოსაკრებლის ოდენობის შესახებ.

5. მოსაკრებლის გადაუხდელობის ან გადახდის ვადის დარღვევის შემთხვევაში გამოიყენება საქართველოს კანონმდებლობით გათვალისწინებული სამართლებრივი ღონისძიებები.

მუხლი 2. მოსაკრებლის გადამხდელი

მოსაკრებლის გადახდა სავალდებულოა ჩოხატაურის მუნიციპალიტეტის ტერიტორიაზე ნარჩენების შეგროვების, გატანის სისტემის მქონე ტერიტორიებზე, საყოფაცხოვრებო ნარჩენების წარმომქმნელი ყველა ფიზიკური და იურიდიული პირისთვის – ამ ინსტრუქციის თანახმად.

მუხლი 3. მოსაკრებლის განაკვეთი, მისი გამოანგარიშებისა და გადახდის წესი

1. მოსაკრებლის განაკვეთს განსაზღვრავს მუნიციპალიტეტის საკრებულო.

2. მოსაკრებელის განაკვეთი, ჩოხატაურის მუნიციპალიტეტის ტერიტორიის (გარდა დაბა ბახმაროს ტერიტორიისა) დასუფთავებისათვის განისაზღვროს ერთ სულ მოსახლეზე 0.50 ლარით. ოჯახის წევრთა რაოდენობის მიუხედავად, სულადობის მაქსიმალური ზღვრული ოდენობა განისაზღვროს 4 სულით.

3. ორგანიზაციების, დაწესებულებებისა და იურიდიული პირებისათვის მოსაკრებლის განაკვეთი განისაზღვრება მათი საქმიანობის სპეციფიკის გათვალისწინებით, დაკავებული ფართის ან წარმოქმნილი საყოფაცხოვრებო ნარჩენების მოცულობის (კუბური მეტრის) მიხედვით. ნარჩენების მოცულობის მიხედვით განსაზღვრული მოსაკრებლის ოდენობა არ უნდა აღემატებოდეს 25 ლარს ერთ კუბურ მეტრ ნარჩენზე.

4. მოსაკრებელი დაბა ბახმაროს ტერიტორიის დასუფთავებისათვის განისაზღვროს ერთ სულ მოსახლეზე 3 (სამი) ლარის ოდენობით. ოჯახის წევრთა რაოდენობის მიუხედავად, სულადობის მაქსიმალური ზღვრული ოდენობა განისაზღვროს 4 სულით.

5. მოსაკრებლის გადახდის მოკლე ტექსტური შეტყობინება, დასუფთავების გადასახადების ელექტრონული პროგრამის საშუალებით, ეგზავნება იმ უძრავი ქონების მესაკუთრეს ან/და მოსარგებლეს, რომლის საკუთრებაშიც წარმოიქმნება საყოფაცხოვრებო ნარჩენები.

6. მოსაკრებლის გადახდის მოკლე ტექსტური შეტყობინება, გაიგზავნება იმ ორგანიზაციის, დაწესებულებისა და იურიდიული პირის სახელზე, რომლის საქმიანობის შედეგად წარმოიქმნება საყოფაცხოვრებო ნარჩენი.

7. მოსაკრებლის გადახდის მოკლე ტექსტური შეტყობინება უნდა შეიცავდეს შემდეგ ინფორმაციას: ქვითრის ნომერს, აბონენტის საიდენტიფიკაციო კოდს/პირად ნომერს, აბონენტის სახელს, გვარს, სულადობას, გადასახდელ თანხასა და გადახდის ვადას.

8. ფიზიკური პირი ჩოხატაურის მუნიციპალიტეტის ტერიტორიაზე მოსაკრებელს იხდის საცხოვრებელი ადგილის მიხედვით.

9. მოსაკრებელი შეიძლება გადახდილ იქნეს მოსაკრებლის მოკლე ტექსტური შეტყობინებაში დაფიქსირებული ნებისმიერი გადამხდელის მიერ.

10. მესაკუთრე ფიზიკური პირი (გარდა მეწარმე ფიზიკური პირისა), რომლის საკუთრებაშიც წარმოიქმნება ნარჩენი, ვალდებულია წარმომქმნელთა რაოდენობის ცვლილების შესახებ 30 დღის განმავლობაში აცნობოს მოსაკრებლის გადახდევინებისათვის პასუხისმგებელ სამსახურს ან საამისოდ უფლებამოსილ იურიდიულ პირს.

11. მესაკუთრის შეცვლის შემთხვევაში, ყოფილმა მესაკუთრემ, მოსაკრებლის მიმდინარე დავალიანება უნდა დაფაროს იმ თვის ბოლომდე, რომელშიც მოხდა საკუთრების გადაცემა.

12. თუ ახალი განაკვეთის ამოქმედებამდე გადახდილი მოსაკრებელი ნაკლები აღმოჩნდა ახალი განაკვეთის შესაბამისად გადასახდელ თანხაზე, სხვაობა გადაიხდება ახალი განაკვეთის ამოქმედებიდან ერთი თვის ვადაში. თუ წინასწარ გადახდილი თანხა აღემატება ახალ განაკვეთს, ზედმეტად გადახდილი თანხა ჩაითვლება მომდევნო გადასახადში.

მუხლი 4. მოსაკრებლის გადახდის ვალდებულების წარმოქმნა, შეცვლა და მისგან გათავისუფლება

1. ჩოხატაურის მუნიციპალიტეტეტის ტერიტორიაზე მოსაკრებლის გადახდის ვალდებულება წარმოიქმნება მოსახლეობისათვის, ორგანიზაციების, დაწესებულებების, ინდივიდუალური მეწარმეებისა და იურიდიული პირებისათვის, მომსახურების მიწოდებიდან არაუგვიანეს ერთი თვის ვადაში.

2. საწარმოო ობიექტმა ან/და ორგანიზაციამ, რომლებიც სხვადასხვა მიზეზის გამო არ ფუნქციონირებს და არ წარმოიქმნება ნარჩენი, ვალდებულია ცვლილების შესახებ 30 კალენდარული დღის განმავლობაში წერილობით აცნობოს (შესაბამისი დასაბუთებით), მოსაკრებლის გადახდევინებისათვის პასუხისმგებელ სამსახურს ან საამისოდ უფლებამოსილ იურიდიულ პირს, წინააღმდეგ შემთხვევაში იგი არ განთავისუფლდება მოსაკრებლის გადახდის ვალდებულებისაგან.

3. ჩოხატაურის მუნიციპალიტეტის მიერ დაფუძნებული არასამეწარმეო (არაკომერციული) იურიდიული პირები თავისუფლდებიან მოსაკრებლის გადახდის ვალდებულებისაგან.

4. მოსაკრებლის გადახდის ვალდებულებისაგან თავისუფლდება:

ა) საქართველოს კანონმდებლობით განსაზღვრული, სოციალურად დაუცველი ოჯახები კანონმდებლობით განსაზღვრული კრიტერიუმით (სოციალურად დაუცველი ოჯახების მონაცემთა ერთიან ბაზაში არსებული პირები, რომელთა სარეიტინგო ქულა უტოლდება ან ნაკლებია 65 000 ქულაზე);

ბ) საქართველოს ოკუპირებული ტერიტორიებიდან იძულებით გადაადგილებული პირები – დევნილები;

გ) მეორე მსოფლიო ომის მონაწილეები;

დ) საქართველოს ტერიტორიული მთლიანობისათვის, თავისუფლებისა და დამოუკიდებლობისათვის დაღუპული, უგზო-უკვლოდ დაკარგული, მიღებული ჭრილობების შედეგად გარდაცვლილთა ოჯახები.

მუხლი 5. მოსაკრებლის ბიუჯეტში ჩარიცხვის წესი, პერიოდულობა და ვადები

1. მოსაკრებლის გადახდა წარმოებს უნაღდო ანგარიშსწორებით. მოსაკრებელი გადაიხდება ეროვნულ ვალუტაში, მუნიციპალიტეტის შესაბამის ანგარიშზე ელექტრონული ანგარიშსწორების საშუალებით. მოსაკრებლის გადახდა დასტურდება მოსაკრებლის გადახდის თაობაზე გაცემული, შესაბამისი ქვითრის წარდგენით.

2. მოსაკრებელი გადაიხდება ყოველთვიურად, საანგარიშო თვის დასრულებიდან არაუგვიანეს მომდევნო თვის 10 რიცხვისა.

3. გადამხდელს შეუძლია მოსაკრებელი გადაიხადოს წინასწარ.

4. მოსაკრებელი მთლიანად ჩაირიცხება ადგილობრივ ბიუჯეტში.

მუხლი 6. პასუხისმგებლობა მოსაკრებლის გადახდევინებისათვის

1. მოსაკრებლის ამოღების ადმინისტრირებაზე პასუხისმგებელია არასამეწარმეო (არაკომერციული) იურიდიულ პირი – „ჩოხატაურის სერვის ჯგუფი“ (ს/კ 242008796), რომელიც უზრუნველყოფს:

ა) მოსაკრებლის გამოანგარიშების და ბიუჯეტში შეტანის ორგანიზებას;

ბ) სააბონენტო მონაცემთა ერთიანი ელექტრონული ბაზის მართვას;

გ) კვარტალური ანგარიშის წარდგენას.

2. ადგილობრივ მოსაკრებლებთან დაკავშირებულ დავას წყვეტს სასამართლო საქართველოს კანონმდებლობით დადგენილი წესით.

დაწესებულებებისათვის, ორგანიზაციებისათვის, ინდივიდუალური მეწარმეებისა და იურიდიული პირებისათვის დასახლებული ტერიტორიის დასუფთავების მოსაკრებლის ოდენობა

ცხრილი 1

№	მოსაკრებლის გადამხდელთა დასახელება	ზომის ერთეული	მოსაკრებლის ოდენობა თვეში (ზომის ერთეულზე ) ლარი
1	იუსტიციის სახლები	საერთო ფართის 1 მ²	0.2
2	ოფისები, სააგენტოები, პროფესიული და სახელმწიფო ორგანიზაციები, ბანკები, საკრედიტო და საფინანსო ორგანიზაციები	საერთო ფართის 1 მ²	0,2
3	საგანმანათლებლო დაწესებულებები	ერთ მოსწავლეზე	0.1
4	სასტუმროები, საოჯახო ტიპის სასტუმროები	მომსახურების ერთეული (საწოლი)	3
5	საავადმყოფოები, პოლიკლინიკები, სამედიცინო დიაგნოსტიკური ცენტრები	1 მ³	10
6	ექიმებისა და სტომატოლოგიური კაბინეტები	საერთო ფართის 1 მ²	1
7	ქსელური სავაჭრო ობიექტები	1მ³	15
8	მცირე სასურსათო/შერეული საქონლის მაღაზიები	დახურული ფართის 1 მ²	0.35
9	სამრეწველო საქონლის მაღაზიები	სამუშაო ფართის 1 მ²	0,5
10	აფთიაქები	სამუშაო ფართის 1 მ²	0.5
11	აგრარული ბაზრები, ყვავილების ღია და დახურული მაღაზიები	სამუშაო ფართის 1 მ²	0.25
12	შერეული საქონლის ბაზრობები	სამუშაო ფართის 1 მ²	0.3
13	ავტოსადგომები და საწყობები	საერთო ფართის 1მ²	0.08
14	ავტოგასამართი სადგურები	საერთო ფართის 1 მ²	0.15
	ავტომანქანების სარემონტო სადგურები, ტექნიკური მომსახურების ადგილები	ღია საერთო ფართის 1 მ²	0.2
15		საერთო ფართის 1 მ²	0.16
16	სილამაზის სალონები	საერთო ფართის 1 მ²	0.8
17	მცირე სამეწარმეო საქმიანობა, შენობის შიგნით მიმდინარე წარმოებისას საყოფაცხოვრებო მომსახურების ობიექტები	საერთო ფართის 1 მ²	1
18	რესტორნები, პიცერიები, სასადილოები, კაფეები და ბარები	საერთო ფართის 1 მ²	0.5
19	საცხობები	სამუშაო ფართის 1 მ²	0.5
20	საწარმოო ობიექტების ღია ტერიტორიები სადაც, მიმდინარეობს საწარმოო პროცესი	საერთო ფართის 1 მ² (შენობა-ნაგებობის)	1

დაბა ბახმაროს ტერიტორიაზე ორგანიზაცია-დაწესებულებების დასუფთავებისათვის მოსაკრებლის ოდენობა

ცხრილი 2

N	იურიდიული პირები, ორგანიზაციები და დაწესებულებები	ზომის ერთეული	მოსაკრებლის ოდენობა თვეში ზომის ერთეულზე (ლარი)
1	სასტუმრო	კბმ	15
2	დაცვის სამსახური	საერთო ფართის 1მ²	0.2
3	სასურსათო და სამრეწველო მაღაზიები	საერთო ფართის 1მ²	1
4	საცხობები	საერთო ფართის 1მ²	1
5	აგრარული ბაზარი	ღია ფართის 1მ²	1
6	აფთიაქები	საერთო ფართის 1მ²	1
7	აბანოები	საერთო ფართის 1მ²	1
8	სადალაქო, სილამაზის სალონი	საერთო ფართის 1მ²	1
9	ღია ტიპის დასვენების და გასართობი თავშეყრის ადგილები, ატრაქციონები	ღია ფართის 1მ²	0,3
10	ოფისები, სააგენტოები, ბანკები, საკრედიტო, საფინანსო და სახელმწიფო ორგანიზაციები	საერთო ფართის 1მ²	0,3
11	კინოთეატრები და თეატრები	მაყურებლის ერთი სავარძელი	0,5